នៅថ្ងៃទី១៤ ខែសីហា ឆ្នាំ២០២៥ ក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក បានចូលរួមក្នុងសិក្ខាសាលាថ្នាក់ជាតិមួយ ដែលផ្តោតលើប្រធានបទ "ការឈ្វេងយល់អំពីឧបករណ៍វិនិយោគ និងហិរញ្ញប្បទានក្នុងវិស័យមូលបត្រ"។ ព្រឹត្តិការណ៍នេះ ត្រូវបានរៀបចំនៅស្នាក់ការកណ្តាល នៃបេឡាជាតិសន្តិសុខសង្គម (ប.ស.ស.) ដែលរៀបចំដោយ និយ័តករមូលបត្រកម្ពុជា (ន.ម.ក.) និងបេឡាជាតិសន្តិសុខសង្គម (ប.ស.ស.)  និងមានការគាំទ្រពី ផ្សារមូលបត្រកម្ពុជា (ផមក) ក្រុមហ៊ុនមូលបត្រ អេស៊ីលីដា ម.ក ក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក និងក្រុមហ៊ុន Gold Financial Global Investment Co., Ltd. (GFG)។ សិក្ខាសាលានេះមានសិក្ខាកាមចូលរួមប្រមាណជាង១៥០នាក់ ដែលរួមមានថ្នាក់ដឹកនាំ មន្រ្តីរាជការ និងអ្នកជំនាញវិជ្ជាជីវៈក្នុងវិស័យហិរញ្ញវត្ថុ។

ឯកឧត្តម គឹម កែវរស្មី អគ្គនាយករង នៃបេឡាជាតិសន្តិសុខសង្គម (ប.ស.ស.) បានថ្លែងកោតសរសើរចំពោះសារៈសំខាន់ជាវិជ្ជមានរបស់ប័ណ្ណសមាជិក ប.ស.ស. ក្នុងការជួយសម្រួលដល់ការចំណាយលើថ្លៃព្យាបាល និងថ្លៃពិនិត្យដល់ប្រជាពលរដ្ឋ។ ទន្ទឹមនឹងនេះ ឯកឧត្តមក៏បានលើកសរសើរពីការប្តេជ្ញាចិត្តរបស់ ប.ស.ស. ក្នុងការផ្តល់សេវាសន្តិសុខសង្គម និងសេវាហិរញ្ញវត្ថុសំខាន់ៗ ដើម្បីអត្ថប្រយោជន៍ដល់សមាជិកគ្រប់រូប។ ឯកឧត្តមក៏បានបញ្ជាក់អំពីសារៈសំខាន់នៃឱកាសវិនិយោគ ក្នុងការជួយបន្ថែមដល់ការការពារសង្គម និងធានានិរន្តរភាពរយៈពេលវែង។ សុន្ទរកថារបស់ឯកឧត្តម ឆ្លុះបញ្ចាំងពីការគាំទ្រនិងការទទួលស្គាល់ប្រកបដោយគុណតម្លៃពីថ្នាក់ដឹកនាំនៃរាជរដ្ឋាភិបាល ក៏ដូចជាការគូសបញ្ជាក់ពីសារៈសំខាន់ជាយុទ្ធសាស្ត្រនៃកិច្ចសហប្រតិបត្តិការរវាងក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក និងបេឡាជាតិសន្តិសុខសង្គម (ប.ស.ស.) ក្នុងការជំរុញសុខុមាលភាពជាតិ និងកំណើនសេដ្ឋកិច្ចរយៈពេលវែង។

វត្តមានរបស់លោក Eric Loo នាយកប្រតិបត្តិនិងអភិបាលប្រតិបត្តិ នៃក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក បានគូសរំលេចពីតួនាទីរបស់ក្រុមហ៊ុនក្នុងនាមជាអ្នកនាំមុខគេក្នុងការបង្កើតឱ្យមានទីផ្សារគ្រប់គ្រងមូលនិធិ ដែលកំពុងរីកចម្រើននៅកម្ពុជា។ ចក្ខុវិស័យនិងភាពដឹកនាំរបស់លោក មានឥទ្ធិពលយ៉ាងសំខាន់ក្នុងការជំរុញបង្កើតមូលនិធិថ្មីៗបន្ថែមទៀត និងធ្វើឱ្យក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក ក្លាយជាក្រុមហ៊ុននាំមុខដំបូងគេក្នុងទីផ្សារកម្ពុជា។ លោក Low Hon-Yu និងលោក Christopher Wong សមាជិកក្រុមប្រឹក្សាភិបាលដែលមានមូលដ្ឋាននៅប្រទេសសិង្ហបុរី ក៏បានចូលរួមដើម្បីបង្ហាញការគាំទ្រយ៉ាងពេញទំហឹងចំពោះសកម្មភាពថ្នាក់ជាតិដ៏សំខាន់នេះ។ ការរួមបញ្ចូលគ្នារវាងភាពដឹកនាំក្នុងស្រុកនិងភាពជំនាញអន្តរជាតិ គឺជាកត្តាសំខាន់មួយដែលធ្វើឱ្យក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក មានលក្ខណៈពិសេសផ្ទាល់ខ្លួន។

ការប្តេជ្ញាចិត្តរបស់ ក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក ក្នុងការកសាងទីផ្សារដែលរឹងមាំ មិនត្រូវបានមើលរំលងឡើយ។ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) បានបង្ហាញការកោតសរសើរគួរឱ្យកត់សម្គាល់ ចំពោះភាពជាអ្នកគាំទ្រដែលរួមចំណែកសំខាន់ក្នុងភាពជោគជ័យនៃសិក្ខាសាលា និងការប្តេជ្ញារបស់ក្រុមហ៊ុនក្នុងការបណ្តុះបណ្តាលអ្នកវិនិយោគ និងអភិវឌ្ឍទីផ្សារ។ ការទទួលស្គាល់នៅកម្រិតខ្ពស់នេះ បញ្ជាក់យ៉ាងច្បាស់ពីតួនាទីដ៏សំខាន់របស់យើង ក្នុងការកសាងទំនុកចិត្ត និងការផ្សព្វផ្សាយចំណេះដឹង នៅក្នុងប្រព័ន្ធអេកូហិរញ្ញវត្ថុរបស់កម្ពុជា។

លោក ញ៉ែម សុប៉ុល ប្រធានផ្នែកគ្រប់គ្រងសាជីវកម្ម នៃក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក បានធ្វើបទបង្ហាញអំពី "គម្រោងវិនិយោគរួម (CIS)" ដោយបានសម្រាយប្រធានបទហិរញ្ញវត្ថុដ៏ស្មុគស្មាញនេះឱ្យងាយយល់សម្រាប់មន្រ្តីរាជការនៃ ប.ស.ស.។ លោកបានបង្ហាញពីរបៀបដែលមូលនិធិទាំងនេះអាចបង្កើតឱកាសវិនិយោគដោយមានវិន័យ និងមានភាពចម្រុះសម្រាប់ប្រជាជនកម្ពុជាទូទៅ ដែលឆ្លុះបញ្ចាំងពីការប្តេជ្ញារបស់ក្រុមហ៊ុនក្នុងការផ្តល់សិទ្ធិសម្រេចដល់វិនិយោគិន។

ការអនុវត្តការងារប្រកបដោយទស្សនវិស័យ និងការយកចិត្តទុកដាក់លើការអប់រំរបស់ក្រុមហ៊ុន បានបង្កើនការចាប់អារម្មណ៍យ៉ាងខ្លាំងនៅក្នុងសិក្ខាសាលា។ សិក្ខាសាលានេះបានបង្កើតឱ្យមានទំនាក់ទំនង ពិភាក្សា និងសន្ទនាដ៏មានអត្ថន័យជាមួយនាយកប្រតិបត្តិនិងថ្នាក់ដឹកនាំជាច្រើន ដែលបានបង្ហាញពីការចាប់អារម្មណ៍ចំពោះមូលនិធិរបស់ក្រុមហ៊ុន។ នេះបញ្ជាក់ថា ការខិតខំប្រឹងប្រែងរបស់យើងក្នុងការដឹកនាំទីផ្សារវិនិយោគនៅកម្ពុជា កំពុងទទួលបានជោគជ័យ និងកំពុងបង្កើនកិត្តិនាមរបស់យើង ជាអ្នកនាំមុខគេក្នុងទីផ្សារ ដែលគួរឱ្យទុកចិត្ត។

ដោយមានភាពដឹកនាំដ៏រឹងមាំនិងភាពជំនាញអន្តរជាតិ ក្រុមហ៊ុនបេនចារ៉ាន អ៊ែសេត មេនេចម៉ិន (ខេមបូឌា) ម.ក បានប្តេជ្ញាចិត្តចំពោះបេសកកម្មរបស់ខ្លួន គឺ៖ ធ្វើឱ្យការវិនិយោគអាចដំណើរការបានយ៉ាងទូលំទូលាយ បង្កើនការយល់ដឹងពាក់ព័ន្ធនឹងហិរញ្ញវត្ថុ និងមានតួនាទីប្រែក្លាយអនាគតនៃវិស័យហិរញ្ញវត្ថុរបស់កម្ពុជា។